JINOYAT PROTSESSIDA JISMONIY NUQSONLI SHAXSLARNI SO‘ROQ QILISH TAKTIKASINI TAKOMILLASHTIRISH ASOSLARI
Kalit so‘zlar:
jinoyat protsessi, so‘roq qilish, jismoniy nuqsoni bo‘lgan shaxslar, kriminalistik taktika, protsessual kafolatlar, surdotarjimon, tiflopedagog, surdopedagog, psixolog, sun’iy intellekt, raqamli texnologiyalar, kommunikatsiya, inson huquqlariAnnotatsiya
Mazkur tadqiqot jinoyat protsessida jismoniy nuqsonli shaxslarni so‘roq qilish taktikasining protsessual-huquqiy, kriminalistik, psixologik va tashkiliy asoslarini kompleks tahlil qilishga bag‘ishlangan. Tadqiqotning dolzarbligi jismoniy nuqsonli shaxslarning odil sudlovdan teng foydalanish huquqini amalda ta’minlash, ularni so‘roq qilish jarayonida protsessual kafolatlarni kuchaytirish hamda amaldagi qonunchilikda mavjud bo‘shliqlarni bartaraf etish zarurati bilan izohlanadi. Tadqiqotda tizimli, qiyosiy-huquqiy, mantiqiy, kontent-tahlil hamda kompleks ilmiy yondashuvlardan foydalanilib, milliy qonunchilik, xalqaro huquq normalari, xorijiy davlatlar tajribasi va ilmiy manbalar tahlil qilindi. Natijada jismoniy nuqsonli shaxslarni so‘roq qilishning samaradorligi maxsus protsessual kafolatlar, malakali mutaxassislar ishtiroki, individual kommunikatsiya usullaridan foydalanish hamda zamonaviy raqamli texnologiyalarni qo‘llash bilan bevosita bog‘liqligi ilmiy jihatdan asoslandi. Shuningdek, surdotarjimon, tiflopedagog, surdopedagog, psixolog va boshqa mutaxassislarni jalb etish tartibini takomillashtirish, so‘roq jarayonini audio-video qayd etish, sun’iy intellekt asosidagi kommunikatsiya vositalarini bosqichma-bosqich joriy etish hamda jinoyat-protsessual qonunchilikni takomillashtirishga qaratilgan ilmiy-amaliy takliflar ishlab chiqildi. Tadqiqot natijalari jinoyat protsessida jismoniy nuqsonli shaxslarning huquq va erkinliklarini yanada ishonchli himoya qilish, tergov faoliyati samaradorligini oshirish hamda qonunchilik va huquqni qo‘llash amaliyotini takomillashtirishda foydalanilishi mumkin.
