ЎЗБЕКИСТОНДА КОНСТИТУЦИЯВИЙ НАЗОРАТ: ШАКЛЛАНИШИ, БУГУНГИ ҲОЛАТИ ВА РИВОЖЛАНТИРИШ ИСТИҚБОЛЛАРИ

Annotatsiya

Мақолада Ўзбекистон Республикасида конституциявий назорат институтининг шаклланиши ва ривожланиши тадқиқ қилинади. Конституциявий назоратнинг шаклланиши ва бугунги ҳолатини тадқиқ этиш мавжуд муаммоларни таҳлил қилиш ҳамда конституциявий одил судловни амалга ошириш механизмларини такомиллаштириш бўйича таклифлар ишлаб чиқиш имконини беради. Конституциявий суд ваколатларини кенгайтириш ва конституциявий шикоят институтини жорий этиш режалаштирилаётган бир пайтда, конституциявий назоратни ривожлантириш истиқболли йўналишларини белгилаб олиш долзарб масаладир. Конституциявий суд инсоният тарихида инсонларнинг конституциявий ҳуқуқ ва эркинликларини ишончли ҳимоя қилиш, давлат ҳокимияти тармоқлари ўртасида ўзаро тийиб туриш ва манфаатлар мувозанатини барпо этиш, Конституциянинг устунлигини таъминлаш ҳамда уни махсус муҳофаза қилиш мақсадида ташкил этилади. Ўзбекистон Республикасида конституциявий суднинг фаолияти Конс­титуцияни ҳимоя қилиш, унинг нормалари ва принциплари ҳамда унда қатъий мустаҳкамланган инсон ҳуқуқ ва эркинликларини таъминлашга қаратилган. Шунингдек, конституциявий назоратнинг такомиллаштирилиши орқали жамиятни демократлаштириш, конституциявий қонунийликни мустаҳкамлашга хизмат қилади. Ўтган давр мобайнида конституциявий назоратни амалга ошириш, конституциявий судлов ишларини юритишни такомиллаштириш, конституциявий одил судлов самарадорлигини оширишнинг мустаҳкам ҳуқуқий асослари яратилган.