Ushbu maqolada shaxslarni javobgarlikka tortish muddatining o‘tganligi munosabati bilan javobgarlikdan ozod etish hamda uning protsessual tartibi bo‘lgan ish yuritishni rad etish yoki tugatish bilan bog‘liq protsessual muammolar va mazkur masalalarni huquqiy tartibga solish jihatlari tadqiq etilgan. Maqolada jinoyat va jinoyat-protsessual huquqda nazarda tutilgan mazkur javobgarlikdan ozod qilishning moddiy va protsessual asoslari qonunchilik va amaliyot nuqtayi nazaridan tahlil etilgan bo‘lib, mavjud muammoli va kollizion holatlarni bartaraf etish bo‘yicha ilmiy mulohaza va tavsiyalar ishlab chiqilgan. Shuningdek, javobgarlikka tortish muddatining o‘tganligi munosabati bilan bog‘liq moddiy va protsessual normalarda uchrayotgan muammoli holatlarga urg‘u berilgan bo‘lib, unda ushbu asosga ko‘ra javobgarlikdan ozod etishda jabrlanuvchiga yetkazilgan moddiy zarar o‘rnini qoplash masalalari chetda qolganligi va ularning huquqiy jihatlari tadqiq etilgan. Tadqiqotda analiz, sintez, induksiya, deduksiya, qiyosiy-huquqiy tahlil kabi metodlar qo‘llanilgan. Tadqiqot ishida ilg‘or xorijiy tajriba, ilmiy-nazariy qarashlar va tergov hamda sud amaliyoti o‘rganilgan. Buning natijasi o‘laroq, O‘zbekiston Respublikasining Jinoyat-protsessual kodeksi va boshqa qonun hamda qonunosti hujjatlariga tegishli o‘zgartirish va qo‘shimchalar kiritish bo‘yicha taklif va tavsiyalar ishlab chiqilgan.